आमचे सर्व लेख आणि व्हिडीओ मिळवण्यासाठी फॉलो करा : फेसबुक | युट्युब
‘आणि…डॉ.काशिनाथ घाणेकर’ या चित्रपटाच्या निर्मितीचा काळ होता. नवखा दिग्दर्शक अभिजित देशपांडे चित्रपटातील एका भूमिकेसाठी विचारणा करायला अभिनेता सुमित राघवनला जाऊन भेटला.
परंतु सुमितने ती भूमिका साकारण्यास नकार दिला.
सुमितने अभिजितला त्याच्या चित्रपटासाठी शुभेच्छा दिल्या आणि या चित्रपटातील मुख्य भूमिकेसाठी सुबोध भावे यांची निवड सार्थ आहे, असं देखील तो म्हणाला, पण हा विषय तिथेच थांबला नाही.
काही दिवसांनी सुमितला झी मराठी निर्मिती संस्थेचे प्रमुख निखिल साने यांचा कॉल आला. त्यांनी सुमितला त्याच चित्रपटातील एका वेगळ्या भूमिकेसाठी विचारणा केली आणि तो ही भूमिका नाकारू शकणार नाही असं स्पष्टपणे सांगितलं आणि झालं देखील तसं सुमित त्या भूमिकेसाठी एका पायावर तयार झाला.
त्याने ताबडतोब आपला होकार कळवला आणि त्याने चित्रपटातील त्या भूमिकेला योग्य न्यायच दिला नाही तर त्या चित्रपटातील काही प्रसंगात मुख्य भूमिकेत असणाऱ्या सुबोध भावेपेक्षा तो वरचढ ठरला.
चित्रपट महाराष्ट्रभर चालला, प्रचंड कौतुक सर्वत्र चित्रपटाचं करण्यात आलं. सुमितने त्या चित्रपटात जी भूमिका साकारली होती, ती भूमिका होती जेष्ठ अभिनेते डॉ श्रीराम लागू यांची!
डॉ. श्रीराम लागू माहिती नाही, असा मराठी चित्रपट सृष्टीचा व नाट्यसृष्टीचा प्रेक्षक विरळच!
गेली चार दशकं डॉ. श्रीराम लागू यांनी त्यांच्या ठसठशीत अभिनयाने रंगभूमी आणि रुपेरी पडद्यावर असंख्य भूमिका जिवंत केल्या. आज डॉ. लागूंचा जन्मदिवस.
डॉ श्रीराम लागू यांचा जन्म १६ नोव्हेंबर १९२७ रोजी महाराष्ट्रातील सातारा जिल्ह्यात झाला. त्यांनी फर्ग्युसन महाविद्यालयात मॅट्रिकपर्यंत शिक्षण घेतलं.
पुढे त्यांनी पुण्याच्याच बी.जे.मेडिकल कॉलेजमधून एम.बी.बी.एस., एम.एस.चं शिक्षण घेतलं. ते कान नका घसा विकारतज्ञ बनले.
परंतु डॉक्टरकी करत असताना देखील त्यांचा ओढा हा नाटकाकडे होता. ते नाट्य कमिटीचे सदस्य होते. पुण्यात त्यांनी नाटक असोसिएशनचे सदस्यत्व स्वीकारले आणि नाटकात भूमिका साकारायला सुरुवात केली.
या दरम्याच त्यांनी आपल्या शल्य चिकित्सेच्या अभ्यासासाठी टांझानियाचा दौरा केला. पुढे ते मुंबईला स्थायिक झाले. ‘रंगायण’ या नाट्य संस्थेच्या माध्यमातून विविध भूमिका साकारत राहिले. १९६९ मध्ये ते मराठी रंगभूमीवर व्यवसायिक अभिनेते बनले.
कुसुमाग्रज लिखित ‘नटसम्राट’ या नाटकाने डॉ. लागूंना नायक म्हणून एका वेगळ्या उंचीवर नेऊन ठेवलं. नटसम्राटमधील त्यांची भूमिका आणि संवादफेक याचे लोक इतके चाहते झाले की हे नाटक महाराष्ट्रभर हाऊसफुल असायचं.
लोक नटसम्राट बघायला गर्दी करायचे. नाटकाबरोबरच डॉ. लागू यांनी पिंजरा, सिंहासन आणि मुक्ती या मराठी चित्रपटात केलेल्या भूमिका देखील प्रचंड गाजल्या.
डॉ. लागूंनी हिंदी चित्रपटात ही काम केलं, त्यांनी ‘घरोंदा‘ या चित्रपटात साकारलेल्या भूमिकेसाठी त्यांना सर्वोकृष्ट सहाय्यक अभिनेता म्हणून पुरस्कृत करण्यात आले होते.
त्यांनी ‘गलियो का खुद्दार, बादशहा, चरणो की सौगंध, काला धंदा गोरे लोग, लावारीस इत्यादी हिंदी चित्रपटसृष्टीत गाजलेल्या चित्रपटात भूमिका साकारल्या होत्या.
पिंजरा या लागूंच्या चित्रपटाने त्यांना अमाप प्रसिद्धी मिळवून दिली. गमतीची गोष्ट म्हणजे लागू यांनी आधी पिंजराच्या टायटलवरच आक्षेप घेतला होता. त्यांना वाटलं कि पिंजरा नाव द्यायला हा काही जनावरांचा चित्रपट आहे का?
परंतु व्ही. शांताराम यांच्या सांगण्यावरून त्यांनी काम केलं आणि चित्रीकरण जसजसे होत गेले, तशी त्यांना त्यांची चूक उमगली.
हा पिंजरा लाकडाचा किंवा लोखंडाचा नाही तर, माणसाच्या जाणिवेचा पिंजरा आहे. या पिंजऱ्यात माणूस कसा उत्कृष्टपणे सापडू शकेल हे पाहण्यात आले आहे, अशा शब्दांत लागू यांनी पिंजरा चित्रपटाचे वैशिष्टय़ सांगितले.
डॉ. लागूंनी १०० पेक्षा जास्त हिंदी व मराठी चित्रपटात काम केलं असून, ४० हुन अधिक मराठी, हिंदी आणि गुजराती भाषेतील नाटकं केली आहेत.
डॉ. लागू हे त्यांच्या दिवंगत अभिनेते व मराठी चित्रपट सृष्टीचे पहिले सुपरस्टार डॉ काशिनाथ घाणेकर यांच्याशी असलेल्या वादग्रस्त संबंधांमुळे देखील बरेच चर्चेत असायचे.
‘आणि…डॉ.काशिनाथ घाणेकर’ चित्रपटात त्या दोघांतील वाद मांडण्याचा प्रयत्न झाला पण डॉ लागूंनी आपले घाणेकरांशी मैत्रीपूर्ण संबंध होते, आमच्यात वाद होते असं म्हणणं दुर्दैवी असल्याचं मीडियाशी बोलतांना स्पष्ट केलं होतं.
डॉ.श्रीराम लागूंनी दीर्घकाळ रंगभूमीची सेवा करूनव लोकांच्या हृदयात आपल्या अजरामर भूमिकांनी स्थान मिळवलं आहे.
आमचे इतर लेख वाचण्यासाठी आणि व्हिडीओ पाहण्यासाठी क्लिक करा : फेसबुक, युट्युब | Copyright © ThePostman.co.in | All Rights Reserved.