आमचे सर्व लेख आणि व्हिडीओ मिळवण्यासाठी फॉलो करा : फेसबुक | युट्युब
ऐंशी-नव्वदच्या दशकात जुनी कात टाकून भारत एका नव्या रुपात समोर येऊ पहात होता. याकाळात मध्यमवर्गीय लोकांच्या जीवनशैलीत थोडा फार फरक पडण्यास सुरुवात झाली होती. या काळातील काही वस्तूंचा भारतीयांना कधीच विसर पडू शकत नाही. याच काळात शेझ रिपब्लिकच्या जावा मोटारसायकल या कंपनीची येज्दी बाईकही अशीच भारतीयांच्या कायम स्मरणात राहणारी आहे.
शेझ रिपब्लिकनमधून ही बाईक सुमारे १०० देशांत निर्यात होत असे. या बाईकच्या अनेक वैशिष्ट्यांमुळे ती तरुणांच्या गळ्यातील ताईत बनली होती. १९६९ साली शेझ रिपब्लिकमध्ये या बाईकचे पहिले मॉडेल मार्केटमध्ये आले.
येज्दी सोडल्यास त्याकाळी राजदूत आणि बुलेट या दोन बाइक्स होत्या. पण, यातील राजदूत ही अगदीच हलकी वाटत असे, त्यामुळे ही बाईक शरीराने किरकोळ असणाऱ्या मुलांसाठी आहे असा समज झाला होता. तर बुलेट अगदीच मजबूत त्यामुळे बुलेट चालवण्यासाठी शरीरयष्टीही मजबूत असावी असा समज होता.
येज्दी मात्र कोणत्याही सामान्य अंगकाठीच्या माणसासाठी अगदी योग्य बाईक होती.
येज्दीचा चकचकीत रंग, घोंघावणारा आवाज, आणि मजबूत बॉडी यामुळे तरुणांची या बाईकला विशेष पसंती होती. २५० सीसी इंजिन असणारी ही बाईक राजदूत आणि बुलेटपेक्षा जास्त लोकप्रिय होती.
काही लोकांच्या मते, राजदूत ही अगदीच लुकड्या मुलांसाठी योग्य वाटत असे. तर बुलेट फारच जड होती आणि अधिक मजबूत शरीरयष्टीच्या लोकांनी ही बाईक वापरणे चांगले दिसत असे. परंतु, येज्दी अशी गाडी होती, कुणीही त्यावर बसले तरी त्याचा लुक हँडसम वाटेल.
राजदूतचे इंजिन १७५ सीसीचे होते तर बुलेटचे ३५० सीसी. यामुळे २५०सीसीवाली येज्दी बाईक अगदी योग्य होती.
१९७३ पर्यंत जावा मोटारसायकल भारतात विकल्या जात होत्या. त्यानंतर कंपनीने नाव बदलून येज्दी हे नाव घेतले. ‘फॉरेव्हर बाईक, फॉरेव्हर व्हॅल्यू’ या पंचलाईनमुळे तर या बाईकने मार्केटमधील समीकरणेच बदलून टाकली. ही बाईक म्हणजे विश्वसनीयता आणि लवचिकता दोन्हीचे प्रतिक मानले जात असे.
या बाईकमुळे भारतात बाईक रेसिंग, बाईक ऍडव्हेंचर, बाईक रॅलिंगची संस्कृती निर्माण झाली. रेसिंगसाठी तर येज्दी बाईक अगदी परफेक्ट होती. भारतीय रस्त्यांवर तर या बाईकने आपली जादू दाखवली होतीच पण, भारताच्या रेसिंग ट्रेकवरदेखील या गाडीने भरपूर नाव गाजवले.
सी. के. चीन्नाप्पा, जगदीश्वरा रेड्डी, थिरूमल रॉय, रुस्तम हर्मुज्दी आणि अनिता नंजप्पा अशा अनेक बाईक रेसर आपल्या यशाचे श्रेय येज्दी बाईकलाच देतात.
बाईक चालवण्याची आवड असणाऱ्या लोकांमध्ये तर येज्दीचे प्रचंड आकर्षण होते. ट्रेकिंग, रेसिंग अशा थ्रिलर गेम्ससाठी त्यांना येज्दी एक परफेक्ट पार्टनर वाटत असे.
गेली २२ वर्षे येज्दी मार्केटमध्ये नाही, तरीही उत्साही बाइकर्स जुलैच्या दुसऱ्या रविवारी येज्दी डे साजरा करतात. येज्दी बाईक प्रेमींसाठी येज्दी बाईकच्या आठवणी अजूनही ताज्या आहेत. काही लोकांकडे अजूनही ही येज्दी बाईक पाहायला मिळते.
भारतातच नाही तर युरोपमध्येही येज्दी तितकीच लोकप्रिय होती. युरोपमध्ये तर लोक रॅलीसाठी या बाईक शिवाय दुसऱ्या कुठल्याच बाईकचा विचारच करू शकत नाहीत. जावा मोटारबाईकलाच अधिक मजबूत आणि भारतीय रस्त्यांवरून धावण्यायोग्य बनवून तिला अजून सुंदर रूप देण्यात आले. कंपनीच्या वेबसाईटवर येज्दीही अधिक काळ टिकणारी मजबूत बाईक असे वर्णन करण्यात आले आहे.
या गाड्यांची भारतातील वाढती मागणी लक्षात घेऊन जावा कंपनीने भारतात मैसूरमध्येच १९६१ साली एक फॅक्टरी सुरु केली. इथेच याला येज्दी हे नाव देण्यात आले. जावा मोटारचे भारतीय रूप म्हणजे येज्दी. ही गाडी भारतीय रस्त्यांवरून धावण्यायोग्य बनवण्यात आली. शिवाय तिचे रूप देखील थोडेसे पालटण्यात आले, ज्यामुळे ती अधिक आकर्षक वाटू लागली. या गाडीला भारतात भरपूर यश मिळाले.
फक्त सामान्य तरुणांच्यातच नाही तर सिने इंडस्ट्रीत देखील या बाईकची क्रेझ होती. जितेंद्रच्या ‘हमजोली’ पासून ते अमिताभ बच्चनच्या ‘परवरीश’पर्यंत जवळपास सगळ्या सिनेमातील हिरो याच गाडीची सवारी करत असत. यामुळेच तर कॉलेज तरुणांमध्ये या गाडीची क्रेझ आणखीनच वाढली.
त्याकाळी फारुख शेख आणि दीप्ती नवलच्या १९८१ साली आलेल्या ‘चष्मेबद्दूर’मध्ये तर ‘काली घोडी द्वार खडी’ या गाण्यातून या गाडीचेच गुणगान ऐकायला मिळेल.
डोंगर कपाऱ्यातून भटकंती करताना, ग्रुपने सहलीवर जाताना किंवा एखादा मोर्चा, रॅलीमध्ये सहभागी होताना याच गाडीला पसंती दिली जात असे. येझ्दीची स्टाईल आणि लवचिकता यामुळे मुलांमध्येच नाही तर मुलींमध्ये देखील येज्दीची क्रेझ होती. त्याकाळी मुली देखील ही बाईक चालवणे पसंत करत असत.
जावा कंपनीची मैसूर मधील फॅक्टरी काही कारणामुळे बंद पडली. त्यासोबतच येज्दीचे उत्पादन देखील बंद झाले. १९९६च्या दरम्यान ही गाडी बाजारातून गायब झाली. पण, या बाईकशी भारतीयांच्या इतक्या आठवणी जुळल्या आहेत की, त्या आठवणीतून ही बाईक कधीच गायब होणार नाही.
२०१८मध्ये महिंद्रा अँड महिंद्रा कंपनीने येज्दी पुन्हा नव्या रुपात भारतीय बाजारपेठेत आणण्याची घोषणा केली तेंव्हा अनेकांना या गाडीच्या अगमानाची उत्सुकता लागून राहिली होती. २०२० पर्यंत ही बाईक भारतीय बाजारपेठेत उपलब्ध होईल अशी अशा व्यक्त केली जात आहे.
या गाडीसोबत अनेकांच्या आपल्या उमेदीच्या दिवसातील आठवणी जोडलेल्या आहेत. काही लोकांनी आजही आपली जुनी येज्दी संभाळून ठेवली आहे. त्यामुळे तुरळक ठिकाणी आजही ही बाईक रस्त्यावरून धावताना दिसते.
आमचे इतर लेख वाचण्यासाठी आणि व्हिडीओ पाहण्यासाठी क्लिक करा : फेसबुक , युट्युब | Copyright © ThePostman.co.in | All Rights Reserved.