आमचे इतर लेख वाचण्यासाठी आणि व्हिडीओ पाहण्यासाठी क्लिक करा : फेसबुक , युट्युब
मोफत अँटीव्हायरस अॅप्समधूनही कंपन्या भरमसाठ पैसे कमावतात
सायबर सुरक्षा कंपन्या विविध प्रकारचे सॉफ्टवेअर आणि अॅप्स बाजारात आणतात. या अॅप्स सामान्य वापरकर्त्यांपासून ते मोठ्या कंपन्यांपर्यंत सर्वांसाठी उपयुक्त ठरतात. हे प्लॅटफॉर्म फोन, संगणक किंवा स्मार्ट होम गॅजेट्सना सायबर गुन्हेगारांपासून सुरक्षित ठेवतात. परंतु कंपन्यांना संशोधन आणि विकासावर (आर अँड डी) कोट्यवधी रुपये खर्च करावे लागतात. यातून अँटीव्हायरस अॅप्सना नवीन धोक्यांचा सामना करण्यासाठी सक्षम केले जाते. मग प्रश्न असा पडतो की, या सॉफ्टवेअर कंपन्या संगणक आणि स्मार्टफोनसाठी अँटीव्हायरस सॉफ्टवेअर लोकांना पूर्णपणे मोफत कसे देतात? फ्रीमिअम आवृत्तीमुळे कंपन्यांचा फायदा कसा होतो? चला, याबाबतच्या काही पैलूंवर नजर टाकूया.
फ्रीमिअम किंवा मोफत आवृत्तीमध्ये सामान्य वापरकर्त्यांना लागणारे सर्व मूलभूत फीचर्स असतात. पण हे सॉफ्टवेअर नेमके कसे काम करते? सोप्या भाषेत सांगायचे तर, अँटीव्हायरस सोल्यूशन्स ठराविक कालावधीनंतर डिव्हाइस स्कॅन करतात. या स्कॅनिंग दरम्यान व्हायरस, मालवेअर, ट्रोजन, वर्म्स किंवा इतर घातक सॉफ्टवेअर आढळल्यास, अँटीव्हायरस प्रोग्राम ते डिलीट करतो किंवा त्यांना सुरक्षित फोल्डरमध्ये ठेवून युजरला सूचना देतो. बहुतेक अँटीव्हायरस सॉफ्टवेअरच्या फ्रीमिअम आवृत्त्या ही मूलभूत कामे करतात.
“मोफत आवृत्तीला सर्वाधिक पसंती”
सायबर सुरक्षा सॉफ्टवेअरची मोफत आवृत्ती वापरणाऱ्यांची संख्या किती आहे? एका अंदाजानुसार, जगभरात १५० कोटींहून अधिक लोक अँटीव्हायरस सॉफ्टवेअर वापरतात. यातील ६१ टक्के लोक मोफत उपलब्ध असलेला पर्याय निवडतात. अँटीव्हायरसच्या मोफत आवृत्त्या वापरकर्त्यांना जवळजवळ सर्वच सायबर धोक्यांपासून पुरेसे संरक्षण पुरवतात.
मायक्रोसॉफ्ट डिफेंडर, अवास्ट, एवीजी, मॅकएफी, नॉर्टन आणि क्विक हील ही सर्वाधिक वापरल्या जाणाऱ्या अँटीव्हायरस सॉफ्टवेअरपैकी काही प्रमुख नावे आहेत. सर्व ब्रँड्सनी सॉफ्टवेअरच्या मोफत आवृत्त्या उपलब्ध केल्या आहेत. संगणक आणि फोन बनविणाऱ्या कंपन्यांबरोबर करार असल्याने अनेक डिव्हाइसेसमध्ये मोफत अँटीव्हायरस अॅप प्री-इन्स्टॉल्ड येते. उदाहरणार्थ, संगणकात विंडोज ऑपरेटिंग सिस्टीम असल्यास, डिफेंडर फ्री अँटीव्हायरस सॉफ्टवेअर प्री-इन्स्टॉल्ड असते. तसेच, रेडमीच्या फोन्समध्ये बऱ्याचदा अवास्ट सॉफ्टवेअर आधीपासूनच असते.
“फ्रीमिअम सॉफ्टवेअरमधून ग्राहकांना उत्तम अनुभव देऊन सशुल्क सदस्य बनवणे”
संगणक जुन्या कॉन्फीगरेशनचा असल्यास मूलभूत संरक्षण पुरेसे नसते. ब्राउझर आणि ब्राउझर एक्स्टेंशन सुरक्षा, यूएसबी आणि एक्सटर्नल ड्राईव्ह व्यवस्थापन, डिव्हाइस ड्रायव्हर अपडेट्स यांसारखी वैशिष्ट्ये जुन्या सिस्टम वापरणाऱ्यांसाठी आवश्यक आहेत. अनेकदा ही सर्व फीचर्स सशुल्क असतात. याचबरोबर रॅन्समवेअर रोलबॅक, फायरवॉल सुधारणा आणि मल्टी-डिव्हाइस व्यवस्थापन देखील सशुल्क असते. म्हणूनच, या फीचर्सचा वापर करण्यासाठी प्रीमियम सॉफ्टवेअर प्लॅन घ्यावा लागतो. मोफत आवृत्ती वापरणाऱ्यांना या फीचर्सच्या उपयोगाबद्दल अँटीव्हायरस स्कॅन करताना अनेकदा नोटिफिकेशन्सद्वारे आठवण करून दिली जाते. कधीकधी महिनाभरासाठी हे पेड फीचर्स मोफत वापरण्याची संधी (फ्री ट्रायल) देखील दिली जाते. या ऑफरचा लाभ घेण्यासाठी ग्राहकांना आपल्या क्रेडिट किंवा डेबिट कार्डचे तपशील देणे आवश्यक असते. ठरलेल्या मोफत कालावधीत कोणताही चार्ज लावला जात नाही. परंतु, ट्रायल पिरियड संपल्यावर ग्राहकाला सॉफ्टवेअरच्या प्रीमियम फीचर्ससाठी ठरलेली रक्कम भरावी लागते. पण फ्री ट्रायल कालावधी संपल्यावर ग्राहक सशुल्क सदस्य बनतात का? या प्रश्नाचे उत्तर ‘होय’ असे आहे. काही जण महिनाभरात प्रीमियम वैशिष्ट्यांनी खरोखरच प्रभावित होऊन सबस्क्रिप्शन सुरू ठेवतात. अशा प्रकारे, फ्रीमिअम ॲक्सेस देऊन ग्राहकांना सॉफ्टवेअर अपग्रेड करण्यास प्रवृत्त केले जाते.
“ॲडवेअर”
तुम्ही तुमच्या अँड्रॉइड फोनवर अँटीव्हायरस सॉफ्टवेअरची मोफत आवृत्ती वापरली आहे का? या प्रश्नाचे उत्तर ‘हो’ असल्यास, तुम्हाला अँटीव्हायरस स्कॅन करताना ॲपमध्ये पॉप-अप जाहिराती नक्कीच दिसल्या असतील. उदाहरणार्थ, एव्हीजी ॲपची मोफत आवृत्ती वापरकर्त्यांना सुरक्षा स्कॅन पूर्ण करण्यापूर्वी किमान एक व्हिडिओ जाहिरात पाहण्यास भाग पाडते. अशा ॲप्सचा ऑपरेशनल खर्च जाहिरातींमधून वसूल केला जातो. जेव्हा वापरकर्ते जाहिराती वाचतात किंवा व्हिडिओ जाहिरात पाहतात, तेव्हा कंपनी जाहिरातदारांकडून पैसे कमावते. ॲपच्या वैशिष्ट्यांनी प्रभावित झालेले, पण जाहिराती न पाहू इच्छिणारे वापरकर्ते अनेकदा सबस्क्रिप्शन खरेदी करतात. सायबर सुरक्षा कंपन्यांसाठी ही एक फायदेशीर डील ठरते. तुम्ही मोफत आवृत्ती वापरत असाल तर तुम्हाला जाहिराती दाखवून ते पैसे कमावतात, आणि तुम्ही प्रीमियम प्लॅन घेतलात तरीही ते पैसे कमावतात.
“ॲड-ऑन्स क्रॉस-सेलिंग”
तुम्ही संगणकावर अँटीव्हायरस सॉफ्टवेअर वापरत असाल, तर तुमच्यासमोर अनेकदा डिव्हाइसचे सॉफ्टवेअर ड्रायव्हर्स अपडेट करण्याची गरज असल्याचे सुचवणारा पॉप-अप दिसला असेल. त्यातील ‘अपडेट नाऊ’ बटणावर क्लिक केल्यावर सॉफ्टवेअर तुम्हाला थेट प्रीमियम सबस्क्रिप्शन पेजवर घेऊन जाते. यालाच ‘क्रॉस-सेलिंग’ म्हणतात. बहुतेकदा वापरकर्ते अँटीव्हायरस सॉफ्टवेअरची मोफत आवृत्ती इन्स्टॉल करतात आणि ती नियमितपणे वापरतात. एकदा सॉफ्टवेअर इन्स्टॉल झाल्यावर कंपन्यांना डिव्हाइसची स्थिती, वापरकर्त्याच्या संगणक हाताळणीच्या आणि ब्राउझिंगच्या सवयी, यांसारखी माहिती सतत मिळत राहते. तुमच्या डिव्हाइसमधील संभाव्य समस्यांच्या आधारावर, अँटीव्हायरस सॉफ्टवेअर तुम्हाला पीसी ऑप्टिमायझेशन टूल्स, पासवर्ड मॅनेजर्स, आयडेंटिटी थेफ्ट प्रोटेक्शन, व्हीपीएन सबस्क्रिप्शन किंवा इतर ॲड-ऑन्स खरेदी करण्यासाठी वारंवार प्रवृत्त करत राहते. अशा प्रकारे, मोफत आवृत्ती वापरून समाधानी असलेले ग्राहक देखील सिस्टमची क्षमता सुधारण्यासाठी आणि त्यातील त्रुटी कमी करण्यासाठी या ॲड-ऑन्सचे सबस्क्रिप्शन घेतात. ही सेलिंगची रणनीती अत्यंत प्रभावी ठरते, कारण ती थेट वापरकर्त्याच्या वास्तविक समस्यांवर उपाय सुचवते.
“अँप्स सक्षम करण्यासाठी बिग डेटा”
पुढील महत्त्वाचा फायदा म्हणजे बिग डेटा. पण बिग डेटा म्हणजे नक्की काय? संगणक, फोन, आयओटी सेन्सर्स व इतर डिव्हाइसेसमधून दरक्षणाला शेकडो सिग्नल्स, रीडिंग्ज आणि डिजिटल पाऊलखुणा मोठ्या प्रमाणात निर्माण होत असतात. बिग डेटा म्हणजे या सर्व आणि अशाच इतर माहितीचा मोठा संच. मोफत असो वा सशुल्क, प्रत्येक सॉफ्टवेअर प्रोग्राम सतत सर्व्हर्सना डेटा पाठवत असतो. सॉफ्टवेअर इन्स्टॉल करतानाच वापरकर्त्याकडून यासाठी परवानगी घेतली जाते. आर अँड डी म्हणजेच नवीन सायबर धोक्यांवर संशोधन करण्यासाठी हा डेटा अत्यंत महत्त्वाचा ठरतो. बाहेरून विकतण्याऐवजी, सायबर सुरक्षा कंपन्यांना हा डेटा स्वतःच्या सॉफ्टवेअर आणि ॲप्समधूनच मिळतो. वापरकर्त्यांची संख्या जास्त असल्यास डेटा मोठ्या प्रमाणात येत राहतो.
पण हा सगळा डेटा घेऊन नक्की काय केले जाते? बिग डेटाच्या माध्यमातून नवीन व्हायरस, मालवेअर, रॅन्समवेअर आणि इतर धोक्यांची माहिती मिळत राहते. डिव्हाइसमधील विविध ॲप्सचे संशयास्पद वर्तन आणि सायबर हल्ल्यांचे नमुने यांचे वास्तविक वेळी विश्लेषण मानवी बुद्धिमत्ता आणि एआय प्रोग्राम्सच्या सहाय्याने केले जाते. यामुळे सायबर सुरक्षा लॅब्सना धोक्यांचे नवीन प्रकार ओळखण्यास मदत होते. या माहितीच्या आधारे कंपन्या आपले डिटेक्शन इंजिन आणि मशीन लर्निंग मॉडेल्स सतत सुधारतात. थोडक्यात सांगायचे झाल्यास, वापरकर्त्यांकडून मिळवलेला बिग डेटा कंपन्यांना धोक्याचे नमुने ओळखण्यास मदत करतो. यामुळे एखादी सायबर सुरक्षेची समस्या गंभीर रूप धारण करण्यापूर्वीच सॉफ्टवेअर तो धोका ओळखू शकते.
“वैशिष्ट्ये लाँच करण्यापूर्वी त्यांची बीटा चाचणी करणे”
अँटीव्हायरस विकसित करणाऱ्या कंपन्या त्यांच्या ॲप्स आणि प्रोग्राममधील नवीन वैशिष्ट्ये अनेक महिन्यांच्या चाचण्यांनंतरच लाँच करतात. सध्या बऱ्याच कंपन्या डिव्हाइस ऑप्टिमायझर्स, नवीन प्रायव्हसी मॉड्यूल्स, आणि एआय-आधारित रिस्क ॲनालिसिस सारखी फीचर्स ग्राहकांसाठी आणत आहेत. कंपन्या ही वैशिष्ट्ये प्रीमियम ग्राहकांना देण्यापूर्वी, विविध फ्रीमिअम वापरकर्ता गटांसाठी बीटा आवृत्त्यांमध्ये उपलब्ध करून देतात. या पद्धतीमुळे वेगवेगळ्या ऑपरेटिंग सिस्टीम आणि हार्डवेअर कॉन्फिगरेशन असलेली उपकरणे वापरणाऱ्या वापरकर्त्यांकडून अभिप्राय मिळतो. नवीन फीचर प्रत्यक्ष धोक्यांवर कसे काम करते हे समजण्यास मदत होते. या फीडबॅकच्या आधारे त्यांच्या ॲप्समध्ये सुधारणा करता येतात. सर्व चाचण्यांमध्ये यशस्वी ठरलेली नवीन फीचर्सच सशुल्क वापरकर्त्यांना मिळतात. यामुळे कंपन्यांचा बीटा चाचणीसाठी होणारा खर्चही कमी होतो. अशा प्रकारे, विनामूल्य आवृत्त्या नवीन वैशिष्ट्यांची वेगवेगळ्या स्तरांवर ए/बी चाचणी घेण्यासाठी एक उत्तम व्यासपीठ बनतात.
एकूणच, मोफत अँटीव्हायरस अॅप्स कंपन्यांसाठी नफा कमावण्याचे आणि सॉफ्टवेअरची वैशिष्ट्ये सुधारण्याचे एक महत्त्वाचे साधन आहे.
आमचे इतर लेख वाचण्यासाठी आणि व्हिडीओ पाहण्यासाठी क्लिक करा : फेसबुक , युट्युब | Copyright © ThePostman.co.in | All Rights Reserved.
