आमचे सर्व लेख आणि व्हिडीओ मिळवण्यासाठी फॉलो करा : फेसबुक | युट्युब
‘च्युइंग गम’ हा सध्या भारतात लोकप्रिय प्रकार असला तरी एकेकाळी च्युइंग गम खाणाऱ्या लोकांचे प्रमाण फार कमी होते. १९७० आणि १९८० च्या दशकात च्युइंग गम खाणे हा प्रकारच लोकांना आवडत नव्हता. फक्त काही उच्च मध्यमवर्गीय व बॉलीवूड सेलिब्रिटीमध्ये हा प्रकार लोकप्रिय होता.
मग हा च्युइंग गम जनसामन्यात इतका लोकप्रिय कसा झाला?
भारतात च्युइंग गम लोकप्रिय करण्याचं काम केलं ते बिग फन या पहिल्या भारतीय बबल गम ब्रँडने!
या ब्रॅंडने च्युइंग गम फक्त चावण्यासाठी नाहीतर त्यापासून ‘बबल’ बनवण्यासाठी देखील वापरले जाऊ शकतात अशी नवीन बाजू लोकांसमोर आणली, त्यांची ही नवीन मार्केटिंग कल्पना चांगलीच यशस्वी ठरली आणि लहान मुलं या बबल गमकडे मोठ्या प्रमाणात आकर्षित होऊ लागली.
‘बिग फन’च्या ब्रँडिंगनुसार कोण सर्वात चांगला बबल फुलवू शकतो अशा आशयाचं चॅलेंज लहान मुलांना दिलं जात होतं यामुळे मुलांना बिग फनच्या च्युइंग गमचं एक वेगळंच आकर्षण होतं. आजच्या च्युइंग गमप्रमाणे ‘बिग फन’चं च्युइंग गम नव्हतं.
बिग फनच्या च्युइंग गमचं वैशिष्ट्य होतं, त्याची जाडी , गुलाबी रंग आणि गुळचट चव, यामुळे पहिल्यांदा हे च्युइंग गम खाताना बऱ्याच अडचणी येत पण नंतर त्याची सवय होऊन त्यापासून बबल तयार करण्यात एक वेगळाच आनंद येत होता.
बिग फनच्या च्युइंग गमच्या ब्रँडिंगसाठी त्याची मातृसंस्था ‘गम इंडिया लिमिटेड’ने अनेक नाविन्यपूर्ण पद्धतींचा वापर केला होता. सुरुवातीला त्यांनी च्युइंग गमच्या पाठीमागं ‘डिस्ने’चे कार्टून कॅरेक्टर छापायला सुरुवात केली. त्यानंतर १९८७च्या वर्ल्ड कपच्या वेळी बिग फनने क्रिकेट संबंधित कार्ड्स आपल्या च्युइंग गमसोबत विक्री करण्यास सुरुवात केली.
पुढे कार्ड्स बरोबरच स्टँप, कॉइन्स यांची देखील विक्री केली, यामुळे त्यावेळी लहान मुलांमध्ये या च्युइंग गमचे मोठ्या प्रमाणात क्रेझ निर्माण झाले होते. लहान मुलांमध्ये या बिग फनच्या कार्ड्सला जमवायची चढाओढ लागायची.
या कार्ड्सवर क्रिकेट प्लेयर्सची आणि त्यांच्या कारकीर्दीची माहिती छापलेली असायची. त्यांनी किती रन्स केले, किती विकेट घेतल्या, किती शतकं केले या सर्वांचा उल्लेख त्या कार्डवर असायचा. यामुळे मुलं त्याकडे विशेष आकर्षित होत आणि पर्यायाने च्युइंग गमची विक्री देखील मोठ्या प्रमाणावर होत असे. कपिल देव, रवी शास्त्री, व्हीव्हीयन रिचर्डस आणि मोहम्मद अझरुद्दीन या खेळाडूंचे कार्डस मुलांमध्ये विशेष लोकप्रिय होते. त्यासाठी मुलं किती तरी च्युइंग गम खरेदी करायचे.
१९८५ साली सुरू करण्यात आलेला बिग फन काही काळातच त्याच्या जबरदस्त मार्केटिंग स्ट्रॅटेजीमुळे इतका लोकप्रिय झाला आणि ते ही आशा काळात ज्यावेळी आजच्या इतकी ताकदवान प्रसार माध्यमे अस्तित्वात नव्हती, हे फार कौतुकास्पद होते.
आजही त्यांच्या ब्रँडिंग टेक्निक्सचा जाहिरात व्यवस्थापन क्षेत्रात केस स्टडी म्हणून अभ्यासल्या जातात.
बिग फनने आपल्या ब्रँडिंग मार्केटिंगच्या अंतर्गत अनेक क्रिकेटर्सला संपर्क केला होता, त्यांनी चेन्नईच्या टीएनक्यू मार्केटिंग कंपनीच्या मदतीने अजय जडेजा, जावगल श्रीनाथ आणि नयन मोंगिया या खेळाडूंना आपल्या मार्केटिंगसाठी करारबद्ध केलं होतं. त्यांनी १९९६-९७ साली जडेजा, मोंगिया आणि रॉबिन सिंह यांना घेऊन एक जाहिरात देखील तयार केली होती.
बिग फनचे ब्रँडिंग आणि मार्केटिंग जरी अत्यंत प्रभावी असले तरी ९० च्या दशकात या ब्रॅंडला घरघर लागायला सुरुवात झाली, कारण १९९४ साली सेंटर फ्रेश आणि बिग बबूल हे दोन नवीन च्युइंग गम ब्रँड भारतात आले.
त्यांचा दर्जा हा बिग फनपेक्षा उत्तम तर होता शिवाय स्ट्रॉबेरी, वॉटरमेलन आणि मिंट या फ्लेवर्समध्ये ते उपलब्ध असल्याने साहजिकच तरुण पिढीचा लोंढा त्याकडे वळला, या काळात बिग फन मार्केटमधून कमी कमी होत गेले.
बिग फन हे काही अँटी निकोटिन अथवा टूथपेस्टसारखे च्युइंग गम नव्हते, त्याचा वापर फक्त चघळण्यासाठी आणि मौजेचा होता. पण पुढे यात प्रतिस्पर्धी निर्माण झाले आणि बिग फन मागे पडत गेले.
पण असं असून देखील आजही बिग फन त्याने त्याकाळी वाटलेल्या कार्ड्स, कॉईन्स आणि स्टॅप इत्यादीच्या रुपात लोकांच्या स्मरणात आहे. आजही अनेकांनी आपल्या बालपणीची आठवण म्हणून या ब्रँडला जपून ठेवले आहे.
उत्कृष्ट मार्केटिंग स्ट्रॅटेजी, उत्कृष्ट ब्रॅण्डिंगचा नमुना असलेला पण दर्जा न राखल्यामुळे आंतरराष्ट्रीय स्पर्धकांकडून माती खावी लागलेला हा ब्रँड आज ही लोकांच्या आठवणीत आणि मार्केटिंग – जाहिरात क्षेत्राचे शिक्षण घेणाऱ्या लोकांच्या पाठ्यक्रमात जिवंत आहे.
आमचे इतर लेख वाचण्यासाठी आणि व्हिडीओ पाहण्यासाठी क्लिक करा : फेसबुक , युट्युब | Copyright © ThePostman.co.in | All Rights Reserved.