कोरोना व्हायरस चीनने पसरवला या आरोपावर चीन काय म्हणतोय वाचा

आमचे सर्व लेख आणि व्हिडीओ मिळवण्यासाठी फॉलो करा : फेसबुक | युट्युब

जगभरातील कोरोनाचा आकडा आता ७२ लाखांच्या पुढे गेला असून संपूर्ण जगात या महारोगामुळे आर्थिक व जैविक संपत्तीची प्रचंड मोठ्या प्रमाणात हानी होत आहे. अशातच चीनचे प्रधानमंत्री शी जिनपिंग यांनी एक श्वेतपत्रिका जारी करत आपली बाजू मांडताना चीन निर्दोष आहे असं सांगितलं आहे.

कोरोनामुळे अमेरिका आणि ऑस्ट्रेलियासोबतच इतर देशसुद्धा चीनवर कोरोनाकडे दुर्लक्ष केल्याचा आरोप करत आहेत. डब्ल्यूएचओची भूमिका देखील याबाबतीत शंकास्पद आहे. त्यांचा आरोप आहे की, चीनने आरोग्य संघटनेपासून कोरोनाचा धोका मुद्दाम लपविला होता. याचदरम्यान आता चीनने आपली श्वेतपत्रिका जाहीर केली आहे.

स्टेट कौन्सिल ऑफ इन्फॉर्मेशनच्या कार्यालयाने त्यांच्या अध्यक्षांच्या वतीने “Fighting COVID-19: China in Action” ही श्वेतपत्रिका प्रसिद्ध केली. ही श्वेतपत्रिका जाहीर झाल्यापासून जिनपिंग सतत चर्चेत आहेत.

७ जून रोजी प्रसिद्ध झालेल्या या श्वेतपत्रिकेत अध्यक्ष शी जिनपिंग म्हणतात की, २७ डिसेंबर रोजी कोरोनाच्या प्रकरणाची चौकशी करण्यासाठी तज्ज्ञांची मदत घेण्यात आली होती. यानंतरही हे संक्रमण कसे पसरत आहे हे आम्हाला समजू शकले नाही. १९ जून रोजी राष्ट्रीय आरोग्य आयोगाने (एनएचसी) स्थापन केलेल्या उच्चस्तरीय समितीने पहिल्यांदाच हा रोग एका शरीरातून दुसऱ्या शरीरात पोहचत असल्याचं स्पष्ट केलं. यानंतर लगेचच चीनने याविषयी जगाला स्पष्ट सांगितले होते.

चीनने एका सविस्तर स्पष्टीकरणात असे म्हटले आहे की या व्हायरसमुळे अशा प्रकारचा विध्वंस होईल याची आम्हाला काहीच कल्पना नव्हती. एकंदरीत हे जाहीर केलेले कागदपत्रे चीनकडून आलेले त्यांचे अंतिम विधान मानले जात आहे. म्हणजेच जर कोणत्याही तपासणीतील निकाल या श्वेतपत्रिकेपेक्षा भिन्न असतील तर चीनला यात दोषी मानलं जाईल.

श्वेतपत्रिका म्हणजे काय?

श्वेतपत्रिका हा एक प्रकारचा अहवाल असून याद्वारे एखाद्या मुद्द्याची/विषयाची/समस्येची सविस्तर माहिती दिली जाते. जेव्हा सामान्यतः या विषयावर बर्‍याच कल्पना एकत्र येत असतात आणि लोकांना ते समजून घेण्यात समस्या येतात अशा वेळी ही श्वेतपत्रिका जारी केली जाते. या पत्रिकेच्या माध्यमातून नेमका मुद्दा सगळ्यांना समजतो आणि समस्येवर तोडगा निघतो, तसेच श्वेतपत्रिकेत जे लिहिले आहे त्यावरून विविध निष्कर्ष देखील काढता येतात.

सामान्यत: ही श्वेतपत्रिका राजकीय आणि सामाजिक विषयांवर प्रसिद्ध होते परंतु ९० च्या दशकापासून तिचा व्यवसायातही वापर करण्यास सुरवात झाली आहे. १९२२ मध्ये जेव्हा दंगल सुरू झाली तेव्हा विन्स्टन चर्चिलने व्हाईट पेपर प्रसिद्ध करण्यास सुरुवात केली. याला चर्चिल व्हाइट पेपर असे म्हटले जाऊ लागले.

लोकशाही असणाऱ्या देशांमध्ये श्वेतपत्रिकेला खूप महत्त्व आहे, इथे राजकारणी एखाद्या पॉलिसीवर आपले मत देण्यासाठी आणि लोकांपर्यंत पोहोचण्यासाठी श्वेतपत्रिका काढतात. कॅनडामधील श्वेतपत्रिका थेट जनतेपर्यंत दिली जातात, त्यामागे असं कारण सांगितलं जातं की एखाद्या पॉलिसीबद्दल लोकांचे मत देखील या श्वेतपत्रिकेमुळे सरकारला कळते. अशा प्रकारच्या विविध रंगांच्या पत्रिका असतात त्यांच्या रंगाच्या आधारे कुठे वापरायचे हे ठरविले जाते.

यामधील हिरवी पत्रिका (ग्रीनपेपर) हा सरकारी कामांचा मसुदा किंवा प्रस्ताव सादर करण्यासाठी आहे. यामध्ये कामाचे कोणतेही आश्वासन नसते. ही केवळ एक चौकट असते की ज्यात अशा प्रकारे काम करता येईल हे सादर केले जाते.

तर गुलाबी पत्रिका (पिंक पेपर) सुद्धा आहे. हे पत्र अमेरिकेच्या बर्‍याच राज्यांत सादर होतं असते. हे पत्र धोरणाविषयी चर्चा करण्यासाठी वापरले जाते. पण ते मर्यादित लोकांसाठीच उपलब्ध असते. तसेच निळी पत्रिका (ब्लू पेपर) देखील आहे, जो तंत्रज्ञानाबद्दल बोलतो. ब्लू पेपरच्या माध्यमातून सरकारी विभाग कोणत्याही तांत्रिक गोष्टीबद्दल भाष्य करतात.

यातलाच आणखी एक महत्त्वाचा प्रकार म्हणजे पिवळे पत्रिका (यलो पेपर). सदर पत्र हे अंतिम पत्र असते, परंतु ते प्रकाशित करणे अद्याप बाकी आहे. याच पत्राला प्रीप्रिंट असे देखील म्हणतात.

सामान्यत: श्वेतपत्रिकेनंतर देश नेहमीच काही ना काही राजकीय भूमिका घेतात. ही पत्रिका जाहीर केल्यानंतर एक नवीन कायदा बनविला जाऊ शकतो. साडेपाच महिन्यांनंतर चीनकडून श्वेतपत्रिका येणे ही नवीन नियमाची सुरूवातही असू शकते असा अंदाज वर्तविला जात आहे.

आमचे इतर लेख वाचण्यासाठी आणि व्हिडीओ पाहण्यासाठी क्लिक करा : फेसबुक , युट्युब | Copyright © ThePostman.co.in | All Rights Reserved.