आमचे इतर लेख वाचण्यासाठी आणि व्हिडीओ पाहण्यासाठी क्लिक करा : फेसबुक , युट्युब
ईशान्य भारताचा प्रदेश हा विविधतेने नटलेला आहे. इथे भिन्न सांस्कृतिक पार्श्वभूमी असलेले, विविध जमातींचे लोक राहतात. भारताच्या या भागात वास्तव्य करणाऱ्या आदिम जमाती गेल्या अनेक वर्षांपासून आपल्या पूर्वजांच्या प्रथा परंपरांचे पालन करत आहेत. यातीलच एक जमात म्हणजे नागा!
नागा जमातीचे लोक ईशान्येकडील पर्वतीय प्रदेशात राहतात. शाळेत असताना आपण नागा जमातीविषयी आपल्या पाठ्यपुस्तकात नक्कीच वाचले असेल. पण नागा जमातीबद्दल अशा अनेक गोष्टी आहेत ज्याबद्दल अजूनही आपल्याला कल्पना नाही. त्यावरच आपण आज प्रकाश टाकणार आहोत.
नागा जमातीला ‘नागा’ हे नाव कसे मिळाले याचा किस्सा मोठा रंजक आहे. नागा लोक भारताच्या सुदूर ईशान्येकडील पर्वतीय प्रदेशात अत्यंत दुर्गम भागात राहतात. नागा लोक ज्या परिसरात राहतात, त्याचा एक मोठा भाग म्यानमारमध्ये आहे. पूर्वीच्या काळी म्यानमारच्या जंगलात राहणाऱ्या लोकांना ‘नाका’ असे म्हटले जात होते. ‘नाका’ हा शब्द म्यानमारच्या भाषेतील आहे.
प्राचीन काळी कानात खडे परिधान करणाऱ्या लोकांना “नाका” म्हणून संबोधित करण्यात येत होते. म्यानमारच्या जंगलात राहणाऱ्या या जमातीचा कालानुरूप विस्तार झाल्यामुळे भारताच्या नागालँडच्या प्रदेशात हे लोक बहुसंख्येने वास्तव्य करू लागले. ‘नागालँड’वरून या लोकांना नागा म्हणून ओळखले जाऊ लागले.
प्रकृतीच्या अगदी जवळ राहत असल्यामुळे नागा लोकांमध्ये निसर्ग पूजेला मोठे महत्त्व आहे. नागालँडच्या घनदाट अरण्यात १०० प्रकारच्या जमातींचा वास आहे. यापैकी १६ नागा जाती असून त्यांच्या प्रथा परंपरा वेगळ्या आहेत. या लोकांच्या वेगळ्या प्रथा परंपरा असून भिन्न भाषा आहे. प्रत्येक नागा आदिवासी हा ख्रिस्ती झाला नसून काही लोक अजूनही प्राचीन परंपरांचे पालन करत आहेत. हे लोक वृक्ष, सूर्य आणि चंद्राची पूजा करता.
नागा लोकांनी अजूनही आपली मातृभाषा जपली आहे. एवढेच नाही, तुम्हाला आश्चर्य वाटेल पण नागा लोक हे इंग्रजीचे उत्तम जाणकार आहेत. आपल्याला वाटते पण या जमातीतील लोक भरपूर शिकलेले असतात. या जमातीच्या लोकांनी जंगलांमध्ये शाळा उघडल्या असून त्यांच्या मदतीने हे लोक या भागात शिक्षणाचा प्रचार-प्रसार करतात.
नागालँडमध्ये राहणारे लोकांची वेशभूषा वेगळीच असते. ते स्वतःच्या शरीराभोवती रंगीबेरंगी कपडे गुंडाळतात आणि गळ्यात-कानात हाडांची माळ घालतात. गेली अनेक शतके हे लोक अशीच वेशभूषा करत आहेत. ज्यावेळी भारतावर ब्रिटिशांचे राज्य होते त्यावेळी त्यांनी या जमातीचा लोकांचा छळ करण्यास सुरुवात केली होती.
नागा लोकांवर इंग्रजांनी आक्र*मण केले होते, त्यावेळी त्या आधुनिक ह*त्यार बाळगणाऱ्या इंग्रजांशी नागा लोकांच्या पूर्वजांनी हाडांचे ह*त्यार तयार करून यु*द्ध केले होते. त्या पूर्वजांच्या स्मृतिप्रीत्यर्थ नागा लोक हाडांची आभूषणे परिधान करतात.
या लोकांचा बऱ्याच गोष्टींवर अंधविश्वास असतो. निसर्ग पुजेमुळे हे लोक अंधविश्वासु बनले आहेत, असे म्हणतात. नागा लोकांमध्ये लग्नाच्या वेळी मुलींना मुलांना नाकारण्याचे पूर्ण स्वातंत्र्य आहे.
नागालँडमध्ये विवाहाची फार विचित्र परंपरा आहे. नागालँडमध्ये विवाहाच्या वेळी मुलीने एखादं वाईट स्वप्न पाहिले तर ती विवाहाला नकार देऊ शकते.
निसर्गाच्या सानिध्यात वास्तव्य करत असल्यामुळे त्यांच्यातील रचनात्मक व कलात्मक गुणांना वाव मिळाला आहे. हस्तशिल्पांच्या निर्मितीची कला या लोकांना अवगत आहे. हे लोक उत्तम कारागीर असून हस्तकलेच्या माध्यमातून अनेक चांगल्या कलाकृती घडवतात. घरात वापरण्यात येणाऱ्या गरम शाली तयार करण्यासाठी हे लोक प्रसिद्ध आहेत. बांबूपासून ते अनेक वस्तूंचे उत्पादन करतात. हे लोक जंगलात राहून निसर्गाचे पूजन करतात.
आमचे इतर लेख वाचण्यासाठी आणि व्हिडीओ पाहण्यासाठी क्लिक करा : फेसबुक , युट्युब | Copyright © ThePostman.co.in | All Rights Reserved.
