आमचे सर्व लेख आणि व्हिडीओ मिळवण्यासाठी फॉलो करा : फेसबुक | युट्युब
सुर्यवंशम चित्रपट सेट मॅक्सवर आला की लगेच मिम्स पसरायला लागतात. अमिताभचे डायलॉग लोकांना पाठ झालेत, एका वेगळ्याच प्रकारचा हा कल्ट सिनेमा झालाय. असं का घडलं, नेमकं काय विशेष होतं या सिनेमात, याबद्दलच्या काही रंजक गोष्टी बघुयात.
१९९९ साली सुर्यवंशम प्रदर्शित झाला. त्यावर्षी अमिताभच्या नशिबी एकही सुपरहिट चित्रपट नव्हता, त्यात या चित्रपटाची भर पडली. अमिताभला घेऊन दाक्षिणात्य सिनेमासृष्टीत चित्रपट बनवला जातोय, यामुळं प्रसिद्धी होती पण सिनेमागृहात प्रेक्षकांचा प्रतिसाद विशेष नव्हता.
7 कोटीचं बजेट असलेल्या चित्रपटाने १२.६४ कोटी अशी समाधानकारक कमाई केली. कादर खान, अनुपम खेर यांच्यासारखे दिगग्ज अभिनेते असताना अपेक्षा खूप होत्या. प्रसिद्ध दाक्षिणात्य अभिनेत्री सौंदर्याचा हा शेवटचा चित्रपट ठरला. बीजेपीच्या प्रचार सभेला जाताना विमानाच्या अपघातात तिचा मृत्यू झाला.
१९९९ लाच सेट मॅक्स चॅनल सुरू झालं आणि त्यांनी वितरणाचे हक्क खरेदी केलेला सुर्यवंशम हा पहिला चित्रपट.
चित्रपट सिनेमागृहात चालला नसल्याने अगदी ९९ वर्षांसाठीचे हक्क त्यांना खूप स्वस्तात मिळाले. बरेच लोक समजतात की यामुळं सेट मॅक्स हा चित्रपट परत परत दाखवत राहील. पण रिटेलिकास्टचं खरं कारण हे नाही. चॅनलची टी आर पी घसरत असताना काही विशिष्ट चित्रपट दाखवल्यानंतर ती परत वाढते असं निदर्शनास आलं.
मॅक्सवर नागार्जुन चा “डॉन नंबर वन”, झी सिनेमावर “हम साथ साथ है”, फिल्मी वर “वेलकम” या चित्रपटांनाही असाच प्रतिसाद आहे, म्हणून हे लक्षात घेणं गरजेचं आहे की फक्त सुर्यवंशमच परत परत दाखवला जातो असं नाही, त्याच्याइतकाच किंवा त्यापेक्षा जास्त वेळेस दाखवले जातात अशे सिनेमेही बरेच आहेत.
सुर्यवंशममुळे टी आर पी वाढते म्हणजे हा सिनेमा परत परत बघणारा प्रेक्षकवर्ग मोठा आहे, याचा अर्थ लोकांना ह चित्रपट आवडतो. हा लेख वाचणाऱ्या वाचकांना जरी तो आवडत नसला, तरीही सिनेमा बघण्याची एकमेव संधीच जिथे टी व्ही आहे, तिथल्या लोकांना हा सिनेमा आवडतो. याचं एक मुख्य कारण म्हणजे सिनेमातील गाणे प्रसिद्ध आहेत, सिनेमात अर्धनग्न सीन्स नाहीयेत यामुळं चित्रपट फॅमिली फ्रेंडली होतो.
घरकाम करत असताना गृहिमींसाठी, लहान मुलांना खेळवताना टीव्ही वर दुसरं काही चालू असण्यापेक्षा या चित्रपटाकडे त्यांचा कल जास्त असतो. हे निदर्शनं आहेत, माझं वैयक्तिक मत यापुढे जाऊन थोडं वेगळं आहे. हा सिनेमा श्रीलंका, हैरदाबाद, गुजरात अशा विविध लोकेशन्सवर शूट केला गेला.
यात अमिताभ म्हाताऱ्या ठाकूरच्या रोल मध्ये, त्याच्या मोलमजुरी करणाऱ्या मुलाच्या रोलमध्ये आणि नंतर तोच मुलगा बिजनेसमन झाला की सूट बूट मध्ये मध्यमवयीन रुपात, अस तीन पूर्णपणे वेगळ्या पात्रात बघायला मिळतो.
निव्वळ विनोदासाठी कादर खान आणि अनुपम खेर यांना वापरलंय. सौंदर्याचं पात्रं ही लग्नानंतर बरच बदलतं आणि शेवटी तर ती कलेक्टर म्हणून येते. या सगळ्या गोष्टींमुळे एकाच चित्रपटात खूप वेगवेगळी विश्व बघायला मिळतात. आज तुम्ही सुरुवात बघितली असेल तर एक महिन्यानंतर तुम्ही याचा मध्य बघता. याप्रकारे तुम्ही वेगवेगळ्या सिनेमात गुंतल्याचा फील एकाच चित्रोतातून घेता, चित्रपटाची लांबी आणि पल्लेदार संवाद त्यात भर घालतात. म्हणून हा अनुभव लोकांना आवडतो.
अर्थात शहरी प्रेक्षकांकडे सिनेमगृहात जाऊन नवीन चित्रपट बघण्याची संधी असते. डिजिटल प्लॅटफॉर्ममुळे तर ते अजूनच सोपं झालंय. पण अजूनही आपल्या राज्याच्या 70% जिल्ह्यात एक किंवा दोन जुनी सिनेमागृह आहेत. तिथे सहपरिवार जाणं लोक टाळतात. म्हणून टी व्ही वर येणाऱ्यापैकी कमी वाईट निवडणे एवढंच ते करू शकतात. हम आप के है कौन ?, कभी खुशी कभी गम, धुमधडाका, मेरी जंग, क्रिश, धमाल हे सिनेमेही याच प्रकारचे आहेत. खेड्यांमध्ये अजूनही मिथुनच्या चित्रपटांना लोकप्रियता आहे.
जगभरात चांगल्या सिनेमांइतकीच सगळ्यात जास्त वाईट असणाऱ्या चित्रपटांनाही मोठ्या प्रमाणावर प्रेक्षकवर्ग उपलब्ध आहे. “द रूम” हा ही असाच एक “जगातला सर्वात वाईट सिनेमा” म्हणून गणला जातो, तरी याचे फॅन्स जगभरात वाढत आहे. असं का होतं? याचा शास्त्रीय पद्धतीने अभ्यास केल्यावर “वोक्स” या चॅनलने याबाबद्दल माहिती दिली.
त्यानुसार जसं चांगला सिनेमा कुठला हे कळण्याची क्षमता आणि रसिकता प्रेक्षकांमध्ये असते, त्यामुळेच “वाईट सिनेमा” कुठला हे ही त्यांना ओळखता येतं. म्हणून ते त्या क्षमतेमुळे तसा वाईट सिनेमा बघून स्वतःची रसिकता जोपासतात. सोप्यात सांगायचं तर वाईटाचा वाईट म्हणण्याचा आनंद मिळविण्यासाठी. भारतात सांगायचं झालं तर “गुंडा” चित्रपट सर्वात वाईट प्रकारातला मानला जातो, तरी युट्युबवर त्याला जवळपास 3 कोटी व्ह्यूज् आहेत. सिनेमासृष्टीच्या प्रसिद्धीला अशी ही एक वेगळी आणि रंजक किनार आहे.
आमचे इतर लेख वाचण्यासाठी आणि व्हिडीओ पाहण्यासाठी क्लिक करा : फेसबुक , युट्युब | Copyright © ThePostman.co.in | All Rights Reserved.