आमचे सर्व लेख आणि व्हिडीओ मिळवण्यासाठी फॉलो करा : फेसबुक | युट्युब
प्रॉडक्ट कुठलंही असू देत, टाटा या ब्रॅन्डचं नाव कायमच विश्वास आणि गुणवत्ता यांच्याशी जोडलं गेलं आहे. काही वर्षांपूर्वी बाजारात दाखल झालेल्या टाटा नेक्सोन इव्ही या कारचा बोलबाला पाहता हेच परत एकदा दिसून आलं. देशातली पहिली इलेक्ट्रिक कार असा लौकिक असलेली ही गाडी अल्पावधीत लोकप्रिय झाली.
हरित ऊर्जा या संकल्पनेवर आधारलेली कार म्हणून हिची नंबर प्लेटपण हिरव्या रंगाची आहे. आज पेट्रोल आणि डिझेलच्या सतत वाढत्या किंमती पाहता ही कार डिमांडमध्ये असणं स्वाभाविक होतं. टाटा या नावाला साजेसं असलेलं तिचं आबदार व्यक्तिमत्त्व आणि तिच्या वापरातून मिळणारे प्रत्यक्ष/अप्रत्यक्ष फायदे अनेकांना मोहवून गेले. अगदी कमी कालावधीत तब्बल २००० पेक्षा जास्त गाड्या विकल्या गेल्याने इलेक्ट्रिक व्हेइकल्सचं भविष्य उज्ज्वल आहे हे अधोरेखित झालं.
या गाड्यांचं चार्जिंग करण्यासाठी प्रति किलोमीटर खर्च आहे फक्त ०.७२४ रुपये.
त्यावरही केरळमधल्या एका डॉक्टरने नामी उपाय शोधून काढला आहे. त्यांचं नाव जोजो जॉन. ते सोलर पॉवरचा वापर करून गाडीची बॅटरी चार्ज करतात आणि त्यामुळे आज गाडी चालवण्यासाठी त्यांना शून्य खर्च आहे. इतर इलेक्ट्रिक व्हेइकल्सना लागतं तसं त्यांना गाडीचं चार्जिंग करण्यासाठी पैसे पडत नाहीत. घरी बसवलेल्या ५ किलोवॅट ऑन ग्रिड सोलर सिस्टीमच्या मदतीने ते आपली कार चार्ज करतात.
त्यांनी गाडी खरेदी करायचं ठरवलं तेव्हाच लॉकडाऊन सुरू झालं आणि त्यामुळे त्यांचा बेत काहीसा लांबणीवर पडला. पुढे लॉकडाऊनच्या काळातच त्यांनी गाडी खरेदी केली. त्यानंतर मात्र त्यांनी ऑन ग्रिड सोलर सिस्टीमचा पुरेपूर वापर करून घेतला. सौर ऊर्जेच्या मदतीने त्यांच्या गाडीचं चार्जिंग तर होऊ लागलंच, पण या सिस्टीममध्ये निर्माण झालेली वीज आज ते स्थानिक वीजनिर्मिती केंद्रास पुरवतात, त्यामुळे त्यांना विजेच्या बिलाचा खर्चही नाही.
उलट केरळच्या इलेक्ट्रिसिटी बोर्डाकडूनच त्यांना ही वीज पुरवण्यासाठीचे पैसे मिळतात. ५ किलोवॅट ऑन ग्रिड सोलर सिस्टीममधून दररोज २० ते २२ युनिट्स इतकी वीज मिळते. गाडी फुल चार्ज करण्यासाठी ३० युनिट्स वीज लागते. मग या जास्तीच्या युनिट्सचं काय? तर मुळात ही कार रोज चार्ज करायची गरज नाही.
अगदी शहरात चालवण्यासाठीसुद्धा गाडी आठवड्यातून एकदाच चार्ज करावी लागते. एका चार्जिंगमध्ये ती २५० किलोमीटरपर्यंत आरामात जाते.
त्यांच्याच शब्दांत सांगायचं तर टाटा नेक्सोनच्या पेट्रोल कारसाठी दर वर्षाला १५ हजार किलोमीटर या हिशोबाने ८ वर्षांसाठी साडेसहा लाख रुपये खर्च आहे तर इलेक्ट्रिक कारसाठी हाच खर्च केवळ ७० हजार रुपये आहे- तेही तुमच्याकडे सोलर सिस्टीम नसेल तर. सोलर सिस्टीम असेल तर हाच खर्च अजून बऱ्याच प्रमाणात कमी होऊ शकेल. शिवाय रोड टॅक्स कमी लागतो तो वेगळाच.
आपल्याकडे चारचाकी गाडी वापरणं म्हणजे पांढरा हत्ती पोसणं असं मानतात. हे समीकरण खोटं ठरवतील अशा गाड्या नजीकच्या भविष्यकाळात दाखल होऊ पाहत आहेत. गाडी ही खर्चिक बाब न होता उत्पन्नाचं पर्यायी साधन बनू शकेल, पैशाची बचत करेल आणि पर्यावरण रक्षणाला हातभार लावेल हे तर अजूनच स्वप्नवत! पण हे सत्यात उतरलंय. बघूया अजून कायकाय घडतं ते…
आमचे इतर लेख वाचण्यासाठी आणि व्हिडीओ पाहण्यासाठी क्लिक करा : फेसबुक, युट्युब | Copyright © ThePostman.co.in | All Rights Reserved.