आमचे सर्व लेख आणि व्हिडीओ मिळवण्यासाठी फॉलो करा : फेसबुक | युट्युब
गेल्या काही वर्षांत जगभरात कोरोनाच्या महामारीने धुमाकूळ घातला होता. कोरोनाच्या विषाणूची उत्पत्ती आणि त्याचा प्रसार चीनमधून झाला आहे अशीच चर्चा सगळीकडे आहे. याचाच परिणाम म्हणजे भारतात चिनी मालावर बहिष्कार टाकण्यात आला.
आपण आपल्या रोजच्या जीवनात मोठ्या प्रमाणात चिनी वस्तू कळत-नकळत वापरत असतो. यातल्या काही वस्तू तिथूनच बनून येतात तर काही वस्तू तयार करण्यासाठी लागणारा कच्चा माल चीनमधून येतो. केवळ रोजच्या जीवनात लागणाऱ्या वस्तूच नाही तर सणवारी लागणाऱ्या वस्तूसुद्धा चिनी असतात. मग त्या गणपतीच्या मूर्ती असतील किंवा होळीला वापरल्या जाणाऱ्या पिचकाऱ्या असतील, इतकंच काय तर दिवाळीच्या आकर्षक रोषणाईच्या माळासुद्धा चीनमधूनच येतात.
चीनमध्ये तयार होणाऱ्या वस्तू एवढ्या मोठ्या प्रमाणात आपल्याकडे येण्याचं कारण म्हणजे आपल्याकडे बंद होणारे कारखाने. भारतीय व्यापाऱ्यांना एखादी वस्तू तयार करून विकण्यापेक्षा चीनमधून आयात करून विकणं जास्त फायद्याचं ठरत आहे. यामुळेच ते चीनमधून आलेल्या वस्तूंवर मेड इन इंडियाचा शिक्का मारून बाजारात उपलब्ध केल्या जातायत.
अगदी घरातलं उदाहरण, आपण सकाळी उठल्यावर सगळ्यात आधी ब्रश करायला जातो, अनेकदा हाच ब्रश चीनमधून आलेला असतो पण त्यावर शिक्का मात्र भारतीय कंपनीचा असतो. यानंतर जी टूथपेस्ट असते तिचं कव्हरसुद्धा चीन मध्येच तयार होतं. इतकंच काय तर अशा कितीतरी कंपन्या आहेत की ज्या ती टूथपेस्ट तयार करण्यासाठी लागणारी पावडरसुद्धा चीनमधून आयात करतात.
आपण रोज वापरत असलेले प्लास्टिकचे मग, बादल्या इत्यादी वस्तू सहसा चीनमध्ये बनविलेल्या असतात. अगदी शॅम्पू-साबण या वस्तूसुद्धा बरेचदा तिथूनच येतात.
स्वयंपाकघरात वापरले जाणारे तुमचे नवीन मैलामाईन व तत्सम प्रकारची भांडी, चाकू, स्टँड, हे सगळं कुठून येतं याचा आपल्याला अंदाजही नसेल. बहुतेक भारतीय व्यापारी आता हा माल चीनमधून आयात करतात आणि आणि त्यांच्यावर भारतीय ब्रँडचं लेबल छापतात. हे गेल्या काही वर्षांत खूपच अंधाधुंदपणे केले गेले आहे. ऑफिसमध्ये आपल्या टेबलावर ठेवलेला डेस्कटॉप किंवा लॅपटॉप सहसा चीन किंवा तैवानचा बनलेला असतो. प्रिंटरसुद्धा बहुतेक चीनमधून भारतात येत असतात. इतकंच काय तर आपली वाहन उपकरणांची बाजारपेठही चीनने मोठ्या प्रमाणात व्यापलेली आहे.
स्मार्टफोन ही सध्याच्या घडीला सर्वात जास्त वापरली जाणारी गोष्ट. याच स्मार्टफोनमधील विविध ऍप हे चीनशी संबंधित असतात. भारतातील सर्वाधिक विक्री करणार्या स्मार्टफोन कंपन्यापैकी बहुतांश कंपन्या चिनी कंपनीशी संबंधित आहेत.
इतकंच काय तर रात्री झोपायला जाण्यापूर्वी जेव्हा आपण मनोरंजक कार्यक्रम किंवा टीव्हीवर बातम्या पाहतो तेव्हा आपल्याला माहित नाही की भारतातील ९०% कलर आणि स्मार्ट टीव्ही किट चीनमधून भारतात येतात.
चला तर मग आपण एक नजर टाकूया की चीनमधून भारतात येणाऱ्या नेमक्या कुठल्या गोष्टी आहेत ज्यांच्याशी आपण संबंधित आहोत.
सर्व प्रकारच्या इलेक्ट्रॉनिक वस्तू चीनमधून येतात.
स्मार्टफोन, टीव्ही किट, डिस्प्ले बोर्ड, एसडी कार्ड्स, मेमरी कार्ड्स, लॅपटॉप्स, पेनड्राईव्ह्स, साऊंड रेकॉर्डरसह मोठ्या प्रमाणात एलईडी बोर्ड चीनमधून भारतात येतात. यात वायरलेस आणि संप्रेषण उपकरणेसुद्धा आहेत. त्यांची वार्षिक उलाढाल २१.१ अब्ज डॉलर्स इतकी आहे.
युरोपियन देशांमधून आयात केली जाणार जाणारी यंत्रे आता चीनमधून येतात.
पूर्वी भारतात बऱ्याचशा मशिनरी जर्मनी, फ्रान्स आणि युरोपियन देशांतून येत असत. परंतु आता बहुतेक ते चीनमधून येतात. यात सर्व प्रकारच्या मशीन्स, यंत्रसामग्री, रेल्वे वस्तू, विभक्त अणुभट्ट्या, बॉयलर, वीज निर्मिती उपकरणे आणि यंत्रसामग्री यांचा समावेश आहे. यात वाहने आणि कारचे सामान देखील आहेत.
औषधे आणि रसायने
सर्व प्रकारची सेंद्रिय रसायने आणि त्यांचे घटक खत आणि खताशी संबंधित घटक असतात. औषधांसाठी साहित्य देखील मोठ्या प्रमाणात चीनमधून येते. असं म्हटलं जातं की जर चिनी कंपन्यानी आम्हाला औषधांमध्ये वापरली जाणारी सामग्री पाठविली नाहीत तर मोठे संकट उद्भवू शकते. हे घटक देखील खूप स्वस्त मिळतात.
अगदी भारताने जे हायड्रोक्लोरोक्विन नावाचे औषध परदेशातही मोठ्या प्रमाणात निर्यात केले होते, त्याची सामग्रीही चीनमधून आली होती.
प्लास्टिकच्या वस्तू
दररोज घरोघरी तसेच कार्यालयात वापरल्या जाणार्या प्लास्टिकच्या वस्तू मोठ्या प्रमाणात चीनमधून येत आहेत.
स्टील मशिनरी देखील चीनमधूनच येतात. गेल्या काही वर्षांत स्टीलसोबतच लोखंडाने बनविलेल्या मोठ्या आणि लहान मशीन्स देखील मोठ्या प्रमाणात चीनमधून येऊ लागल्या आहेत.
चष्मे आणि वैद्यकीय आणि सर्जिकल उपकरणे
कोरोनादरम्यान चीन जगात वैद्यकीय आणि शस्त्रक्रिया उपकरणे आणि उपकरणे कशी पाठवित आहे हे आपण पाहिलेच आहे. हा देश गेल्या काही वर्षांत मोठ्या प्रमाणात या वस्तू बनवित आहे. इकडे भारतातही स्वस्त वैद्यकीय व ऑपरेशन थिएटरमध्ये वापरलेली उपकरणे चीनमधून येत आहेत. पूर्वी हे सर्व युरोप आणि अमेरिकेतून येत असत पण आता हा माल शेजारच्या देशातून मोठ्या प्रमाणात येत आहे.
बहुतेक फर्निचरची आयातदेखील चीनमधूनच
आता बाजारात दिसणारे बहुतेक फर्निचर व्यापारी चीनमधून मागवतात. यात फर्निचरचे बरेच प्रकार येतात. जेव्हा भारतात बरीच लक्झरी घरे बांधली जातात तेव्हा लोकं फर्निचरसाठी चीनमध्ये जातात आणि तिथे या वस्तू पाहून आणि ऑर्डर देऊन येतात.
लहान मुलांचे खेळणे आणि क्रीडा उपकरणे
एकेकाळी, मेरठ आणि जलंधर ही देशातील क्रीडा वस्तू आणि संबंधित उपकरणे तयार करण्यासाठी मुख्य केंद्रे होती. परंतु आता या दोन्ही ठिकाणांवर सर्व क्रीडा साहित्य उत्पादकांना अशी तक्रार येते की चीनमधून बरीच क्रीडा साधने आणि उपकरणे येऊ लागली आहेत. याचा परिणाम त्यांच्या उत्पन्नावर देखील झाला आहे.
चीनचा खेळण्यांच्या बाजारपेठेमध्ये ८० टक्के वाटा आहे
बिझिनेस टुडेमध्ये प्रसिद्ध झालेल्या एका मोठ्या अहवालात चीनने प्रत्येक क्षेत्रात कसा प्रभाव पाडला याचे वर्णन केले आहे. या अहवालात असे म्हटले आहे की गेल्या आर्थिक वर्षात चीनमधून ४५१.७ दशलक्ष डॉलर्सचा माल आयात केला गेला होता. असंही म्हटलं जातं की खेळण्यांच्या उद्योगासाठी लागणाऱ्या ८० टक्के वस्तू या चीनमधून आयात केल्या जातात आणि इथे विकल्या जातात.
भारतीय बाजारपेठ चिनी वस्तूंवर प्रचंड मोठ्या प्रमाणात अवलंबून आहे. चीनकडून येणाऱ्या वस्तूंवर पूर्णपणे बंदी घालण्याची मागणी करणं सोपं आहे. परंतु खरंच संपूर्ण बंदी घातल्यास काय होईल याचा विचार करणे देखील खरोखरच कठीण आहे आणि बऱ्याच अंशी अशक्य सुद्धा.
आमचे इतर लेख वाचण्यासाठी आणि व्हिडीओ पाहण्यासाठी क्लिक करा : फेसबुक , युट्युब | Copyright © ThePostman.co.in | All Rights Reserved.